कनिष्ठ महाविद्यालय – जिल्हा व्यवसाय तंत्र प्रदर्शनी

जिल्हा उच्च माध्यमिक व्यवसाय अभ्यास क्रमांतर्गत, जिल्हा व्यवसाय तंत्र प्रदर्शनी चे आयोजन मुंगसाजी महाराज कॉलेज दारव्हा येथे करण्यात आले होते. त्यात तांत्रिक गट =25 प्रतिकृति, वाणिज्य गट =7, कृषि गट=18 असे उपस्थित मॉडेल होते, त्यात आपल्या महाविद्यायाचे तांत्रिक गट=1 व वाणिज्य गट =1 यांनी सहभाग घेतला होता, त्यात वाणिज्य गटातून द्वितीय क्रमांक प्राप्त झाला असुन प्रमाणपत्र, गौरव चिन्ह देण्यात आले व आपल्या दोन विभागानी सहभाग घेतला यांचे प्रमाणपत्र ही मिळाले. सर्व विद्यार्थ्यांचे भरपूर अभिनंदन !

बाबाजी दाते कला आणि वाणिज्य महाविद्यालय यवतमाळ येथे राष्ट्रीय सेवा योजना व कनिष्ठ महाविद्यालय यांच्या संयुक्त विद्यमाने दि. 7/12/23 रोजी टी डी आर एफ यांच्यामार्फतआपत्ती व्यवस्थापन कार्यशाळेचे आयोजन प्राचार्य डॉ. वर्षा कुलकर्णी यांच्या मार्गदर्शनात करण्यात आले.
कार्यक्रमाला प्रमुख मार्गदर्शक म्हणून उपस्थित असलेले टी डी आर एफ चे प्रशिक्षक श्री. हरिश्चंद्र राठोड यांनी विद्यार्थ्यांना व प्राध्यापकांना नैसर्गिकरीत्या व मानवनिर्मित आपत्तीमध्ये बचाव कसा करावा, तसेच पूर, भूकंप या ठिकाणी प्रथमोपचार कसे करावेत याचे प्रशिक्षण दिले.
प्राचार्य डॉ.वर्षा कुलकर्णी यांनी अध्यक्षीय भाषणामध्ये विद्यार्थ्यांना दैनंदिन जीवनात सावध राहून काळजी कशी घ्यावी याविषयी सविस्तर सांगितले. कार्यक्रमाचे सूत्रसंचालन रा.से.यो कार्यक्रम अधिकारी डॉ. वैशाली मेश्राम यांनी तर आभार प्रदर्शन कनिष्ठ महाविद्यालयाच्या पर्यवेक्षिका डॉ. वैशाली बेडेकर यांनी केले. कार्यक्रमाच्या यशस्वीतेकरिता कनिष्ठ व वरिष्ठ महाविद्यालयातील प्राध्यापकानी परिश्रम घेतले.

अनुभव शिक्षा केंद्र यांच्या वतीने 'बाबाजी दाते कला व वाणिज्य कनिष्ठ महाविद्यालय यवतमाळ' येथे दिनांक ४-१०-२०२३ रोजी संवैधानिक मूल्य व मानवी मूल्यांवर आधारित जनजागृती पर कार्यक्रम संपन्न झाला.
या कार्यक्रमाच्या अध्यक्षस्थानी कनिष्ठ महाविद्यालयाच्या पर्यवेक्षक मा.डॉ.वैशाली बेडेकर मॅडम तर प्रमुख मार्गदर्शिका म्हणून अनुभव शिक्षा केंद्राच्या मा.प्रगती राऊत मॅडम उपस्थित होत्या. संविधानाच्या उद्देशपत्रिका वाचनाने या कार्यक्रमाची सुरुवात झाली.
अनुभव शिक्षा केंद्र यवतमाळच्या प्रमुख मार्गदर्शिका मा.प्रगती राऊत मॅडम विद्यार्थ्यांना संबोधताना म्हणाल्या "आता काळ मोठा कठीण आला आहे, जागोजागी संवैधानिक मूल्यांची पायमल्ली होताना दिसत आहे. स्वातंत्र्य, समता, बंधुता, न्याय, लोकशाही, गणराज्य, समाजवाद, समानता ही तत्वे पायदळी तुडवल्या जात आहेत. यासाठी तुमच्यासारख्या तरुण विद्यार्थ्यांनी संवैधानिक मूल्यांची जपणूक व रुजवणूक केली पाहिजे; ती काळाची गरज आहे" यासाठी प्रात्यक्षिक करून त्यांनी संवैधानिक मूल्यांचे महत्त्व विद्यार्थ्यांना पटवून दिले. आज मानवता व माणुसकी या मूल्यांचा ऱ्हास होताना दिसत आहे. मानवाला संवेदनशील होण्यासाठी काही स्फूर्तीदायी व प्रेरणादायी गीतांचे बहारदार सादरीकरण मा. प्रगती राऊत यांनी केले.
अध्यक्ष स्थानावरून बोलताना मा.डॉ. वैशाली बेडेकर मॅडम म्हणाल्या की, "आपल्या महाविद्यालयाची विद्यार्थी असलेल्या माननीय प्रगती राऊत या अनुभव शिक्षा केंद्राद्वारे प्रत्येक शाळा- महाविद्यालयात जाऊन संवैधानिक मूल्य व मानवी मूल्य रुजवण्याचे अतिशय महत्त्वपूर्ण कार्य करीत आहे याचा आम्हाला अभिमान आहे. अशा आगळ्यावेगळ्या कार्यक्रमाने विद्यार्थ्यांना नक्कीच चांगला फायदा होतो" हे सांगत त्यांनी कार्यक्रमाचे भरभरून कौतुक केले. मा.प्राध्यापक राम पंचभाई, मा.डॉ.स्वाती जोशी, मा. प्राध्यापक जयश्री चापोरकर यांनी कार्यक्रमाविषयी आपले मनोगत व्यक्त केले.
कार्यक्रमाचे सूत्रसंचालन प्रा.वैभव डब्बावार यांनी केले तर प्रा.सारिका नंदे यांनी आभार व्यक्त केले. महाविद्यालयातील सर्व शिक्षक-शिक्षकेतर कर्मचारी, तासिका तत्त्वावरील शिक्षक व सर्व कनिष्ठ महाविद्यालयीन विद्यार्थ्यांचा या कार्यक्रमास भरभरून प्रतिसाद राहिला.

बाबाजी दाते कला आणि वाणिज्य महाविद्यालय, यवतमाळच्या विद्यार्थ्यांचे २०२३ च्या उच्च माध्यमिक शालान्त परीक्षेत उत्तम यश
उच्च माध्यमिक शालान्त परीक्षेचा निकाल २५ मे २०२३ रोजी जाहीर झाला. यात बाबाजी दाते कला आणि वाणिज्य महाविद्यालय, यवतमाळच्या विद्यार्थ्यांनी घवघवीत यश मिळविले. वाणिज्य शाखा (इंग्रजी माध्यम) चे ९०%, वाणिज्य शाखा (मराठी माध्यम) चे ८४.८०%, कला शाखा (मराठी माध्यम) चे ६९.८९% व व्यवसाय अभ्यासक्रमाचे (MCVC) ९४.८२% विद्यार्थी उत्तीर्ण झाले. वाणिज्य शाखा (इंग्रजी माध्यम) ची कु. साक्षी किशोर चारमुले ही ९१.६७% मिळवून, वाणिज्य शाखा (मराठी माध्यम) चे कुणाल संतोष मेटकर व राहुल अनिल भिसनकर- हे ८३.१७% मिळवून, कला शाखा (मराठी माध्यम) ची कु. वैष्णवी विजय चारमोडे ही ८२.८३% मिळवून व उच्च माध्यमिक व्यवसाय अभ्यासक्रमाची कु. गौरी अजय सहारे ही ७४.३३% मिळवून आपापल्या शाखेत प्रथम क्रमांकावर आले. यशस्वी विद्यार्थ्यांचे संस्थेचे पदाधिकारी व विद्यालयाचे शिक्षक यांनी अभिनंदन व कौतुक केले.

बाबाजी दाते कला आणि वाणिज्य महाविद्यालय यवतमाळ येथे, राष्ट्रीय सेवा योजना व कनिष्ठ महाविद्यालय यांच्या संयुक्त विद्यमाने दी.२७/१/२०२२ ते २८/१/२०२२ असे २ दिवस १५ ते २५ वयो गटासाठी लसीकरण शिबिर आयोजित करण्यात आले.
शिबिराच्या उद्घाटनप्रसंगी राष्ट्रीय सेवा योजनेच्या कार्यक्रम अधिकारी डॉ. वैशाली मेश्राम ह्यांनी लसीकरणाचे महत्व विद्यार्थ्यांना सांगितले तर सहकार्यक्रम अधिकारी डॉ.जयस्वाल ह्यांनी लसीकरणाचे फायदे सांगून लस घेण्याचे आव्हान केले.
कनिष्ठ महाविद्यालयाचे पर्यवेक्षक प्रा.पंचभाई ह्यांनी जास्तीत जास्त विद्यार्थी लसीकरणाला येतील यांची व्यवस्था करून लसीकरण कोविड पासून वाचण्याचे कसे सुरक्षा कवच आहे हे सांगितले.
जिल्हा परिषद आरोग्य विभागा तर्फे डॉ. शिवराज दरारे, नर्स दिक्षा डंभारे, व मेरी कोरील, प्रोजेक्ट कॉरडीनेटर संदिप घोडे या कर्मचाऱ्यांचे सहकार्य लाभले तर राष्ट्रीय सेवा योजनेच्या निशांत मडावी, कोमल काळे, मनीषा मोकाशे, खुशी नंदनवार, साक्षी चव्हाण, रश्मी परसराम, कुणाल बेंद्रे ह्यांनी सहकार्य केले.

बाबाजी दाते कला आणि वाणिज्य कनिष्ठ महाविद्यालयातर्फे "वाणिज्य शाखा आणि भविष्य" या विषयावर एक दिवसीय कार्यशाळा
बाबाजी दाते कला आणि वाणिज्य कनिष्ठ महाविद्यालयातील वाणिज्य विभागातील विद्यार्थ्यांसाठी दिनांक 7.12.2021 रोजी "वाणिज्य शाखा आणि भविष्य" या विषयावर एक दिवसीय कार्यशाळेचे आयोजन करण्यात आले होते.
कार्यशाळेचे उदघाटन वाणिज्य महाविद्यालय न्यासाचे अध्यक्ष मा. श्री. विनायक दाते यांनी केले. प्रा पंचभाई यांनी कार्यक्रमाची पार्श्वभूमी सांगितली. महाविद्यालयाच्या प्राचार्या डॉ. वर्षा कुलकर्णी, वाणिज्य महाविद्यालय न्यासाचे उपाध्यक्ष व शाळा समिती सदस्य श्री विजयजी कासलिकर यांनी त्यांचे विचार व्यक्त केले व कार्यशाळेला शुभेच्छा दिल्या.
C.A. श्रीदीप इंगोले यांनी वाणिज्य क्षेत्रातील मार्केटिंग क्षेत्रात व्यक्तिमत्व विकासाचे महत्व विशद केले. जग ही एक बाजारपेठ असुन अमर्यादित शक्यतांचे आकाश आहे. कौशल्याने परिपूर्ण तरुणच येथे तग धरू शकेल असे त्यांनी सांगितले. C.A.पियुष खैतान यांनी वर्ग 12 वी नंतर उपलब्ध असलेल्या वाणिज्य अभ्यासक्रमांची माहिती दिली. C.A.विशाखा खेतान यांनी positive attitude (सकारात्मक दृष्टिकोन) व मोठी स्वप्ने याविषयी आकर्षक माहिती दिली. मार्केटिंग क्षेत्रात इंग्रजी भाषेचे महत्व सांगून, जग जिंकण्याचे सगळ्यात सोपे माध्यम म्हणजे इंग्रजी बोलणे होय असे त्यांनी सांगितले.
कार्यक्रमाचे संचलन सौ सारिका नंदे यांनी केले तर आभार प्रदर्शन सौ सौंदले यांनी केले. या कार्यक्रमाला वाणिज्य विभागातील 200 विद्यार्थ्यांनी सहभाग घेतला.

महाराष्ट्र राज्य उच्च माध्यमिक शालांत प्रमाणपत्र २०१९-२० परीक्षेचा दि.१६  जुलै,२०२० रोजी जाहीर झाला. यवतमाळच्या बाबाजी दाते कला आणि वाणिज्य कनिष्ठ महाविद्यालयाने उत्कृष्ठ निकालाची परंपरा कायम राखली आहे.
१२वी वाणिज्य इंग्रजी माध्यमाचा निकाल १०० टक्के
महाविद्यालयातील १२वी वाणिज्य इंग्रजी माध्यमाचा निकाल १०० टक्के लागलेला आहे. १२वी वाणिज्य इंग्रजी माध्यमातून अनिकेत रवींद्र खरतडे ह्याने ८९.८४ टक्के गुण प्राप्त करीत महाविद्यालयातून प्रथम येण्याचा मान मिळविला आहे.
१२वी वाणिज्य मराठी शाखेचा निकाल ९४.१६ टक्के
महाविद्यालयातून १२वी वाणिज्य मराठी शाखेचा निकाल ९४.१६ टक्के लागला असून वाणिज्य शाखेतून आदित्य लक्ष्मिकांत जयस्वाल ह्याने ८५.०७ टक्के गुण प्राप्त केलेले आहे.
१२वी कला शाखेचा निकाल ६५.०७ टक्के
१२वी कला शाखेचा निकाल ६५.०७ टक्के लागलेला असून कला शाखेतून कू. मैथिली संजय चवात हिने ८७.८४ टक्के गुण प्राप्त करीत महाविद्यालयातून प्रथम येण्याचा मान मिळविला आहे.

१२वी उच्च माध्यमिक व्यवसाय अभ्यासक्रमाचा निकाल ९०.९० टक्के लागलेला असून या विभागाच्या तीनही शाखेतील विद्यार्थ्यांनी आपली उज्ज्वल यशाची परंपरा कायम राखली आहे.
इलेक्ट्रिकल टेक्नॉलॉजी शाखेतून यशवंत देशमुख ह्याने ७३.६९ टक्के, ऑटोमोबाईल टेक्नॉलॉजी शाखेतून प्रतिक उदय अराठे ह्याने ६५.६९ टक्के तर बँकिंग फायनान्स सर्विस आणि इन्व्हेस्टमेंट शाखेतून कू. रागिणी सुनील रिठे हिने ७९.३८ टक्के गुण प्राप्त करीत यश संपादन केले आहे.

महाविद्यालयाच्या निकालाबद्दल सर्व गुणवंतांचे वाणिज्य महाविद्यालय न्यासाचे अध्यक्ष विनायक दाते, उपाध्यक्ष सतीश फाटक, उपप्राचार्य डॉ. माणिक मेहरे, न्यासाचे विश्वस्त, शिक्षक, शिक्षकेतर कर्मचारी यांनी कौतुक केले व विद्यार्थ्यांना भावी आयुष्याकरिता शुभेच्छा दिल्या आहेत.

बाबाजी दाते कनिष्ठ महाविद्यालय, यवतमाळ येथे दि. 24.9.2019 रोजी वर्ग 12 वी च्या विद्यार्थ्यांसाठी कार्यशाळा आयोजित करण्यात आली होती.  कनिष्ठ महाविद्यालयाच्या कला व वाणिज्य शाखेच्या 150 विद्यार्थ्यांनी सहभाग घेतला. मार्गदर्शक म्हणून श्री.आर.एम.पंचभाई होते. कार्यक्रमाच्या प्रारंभी कनिष्ठ महाविद्यालयाच्या पर्यवेक्षीका मा.गादे मैडम यांनी  शब्द सुमनांनी श्री.पंचभाई यांचे स्वागत केले  या कार्यशाळेला शिक्षकांपैकी सौं.स्वाती जोशी ह्यांनी उपस्थिती लावुन कार्यशालेच्या यशासाठी विशेष परिश्रम घेतले.
श्री पंचभाई यांनी एकाग्रता कशी प्राप्त करावी, अभ्यास कसा करावा, अभ्यासाची वेळ व वेळचे नियोजन, ताणतणाव व्यवस्थापन, क्षमतेनुसार अभ्यास व परिश्रम आदी विषयांवर सविस्तर मार्गदर्शन केले. विद्यार्थ्यांचा सहभाग अप्रतिम होता. दोन तास मुले भारावलेली होती. प्रश्न विचारुन त्यांनी आपल्या समस्यांचे निराकरण केले. आभार प्रदर्शन स्वाती जोशी यांनी केले.  विद्यार्थ्यांमध्ये दिसून आलेला विधायक व आशादायी बदल हे या कार्यशाळेचे यश होय.

बाबाजी दाते कला वाणिज्य महाविद्यालय ज्युनिअर कॉलेज, संगीत  विभागात  दि. १९ सप्टेंबर २०१९ रोजी पं. भातखंडे पुण्यतिथीचा कार्यक्रम साजरा करण्यात आला. सुरवातीला संस्थेचे अध्यक्ष  मा. विनायक दाते यांचे हस्ते दीपप्रज्वलन,  सरस्वती  पूजन व पं. भातखंडे आणि पं. पलुस्कर यांच्या  प्रतिमांचे पूजन करण्यात  आले. श्रीमती चापोरकर यांनी  प्रास्तविक  केले .डॉ. सौ. जोशी यांनी  अध्यक्षांचे स्वागत  केले. सर्व  विद्यार्थ्यांनी 'संगीत के प्रणेता' हे गीत  सादर केले. अध्यक्ष मा. दाते यांनी आपल्या भाषणात सांगितले की संगीत हा विषय आपल्या  मनाला  आनंद देतो. यात प्राविण्य मिळविण्यासाठी खूप मेहेनत करावी लागेल. कार्यक्रमाचे संचलन कु. साहु हिने तर आभार  प्रदर्शन  कु. पंडागळे हिने केले. कार्यक्रमाला संगीत  विषयाचे  सर्व  विद्यार्थी  उपस्थित  होते.

स्थानिक बाबाजी दाते कला आणि वाणिज्य महाविद्यालय, कनिष्ठ विभागातर्फे जागतिक आत्महत्या प्रतिबंधक दिनानिमित्त कार्यक्रमाचे आयोजन करण्यात आले. त्यावेळी आरोग्य व आत्महत्या या विषयावर डॉ. तरंग तुषार वारे, मुख्य जिल्हा शल्य चिकित्सक, शासकीय जिल्हा रुग्णालय, यवतमाळ, यांनी विद्यार्थ्यांना मार्गदर्शन केले. तसेच मानसिक आरोग्य व आत्महत्या या विषयी डॉ. सरफराज सौदागर यांनी तर श्री. संदीप नवसरे यांनी व्यसनाधीनता, त्याविषयीची मानसिक गुंतागुंत आणि त्यातून घडणाऱ्या आत्महत्या याविषयी सखोल माहिती दिली.
या प्रसंगी जागतिक आत्महत्या प्रतिबंधक प्रेरणा समितीतील सर्व सदस्य, महाविद्यालयाच्या उपप्राचार्या प्रा. डॉ. सौ. माणिक मेहरे, कनिष्ठ महाविद्यालयाच्या पर्यवेक्षिका प्रा. आशा गादे, सर्व शिक्षक व विद्यार्थी उपस्थित होते. कनिष्ठ विभागातील शिक्षक व शिक्षकेतर कर्मचाऱ्यांच्या सहकार्याने कार्यक्रम यशस्वी झाला

बाबाजी दाते कला आणि वाणिज्य कनिष्ठ महाविद्यालयात दि.२८/८/२०१९ रोजी महाविद्यालयाच्या गृह अर्थशास्त्र विभागातर्फे "जीवन अनमोल" या आरोग्यविषयक कार्यक्रमाचे आयोजन करण्यात आले. मानवी जीवनात संरक्षण व संरक्षक प्रणालीचे अनन्यसाधारण महत्त्व आहे. आकस्मिक परिस्थितीत मरणोन्मुख व्यक्तीला वेळेवर जीवन संजीवनी म्हणजे बेसिक लाईफ सपोर्ट मिळाला तर त्या व्यक्तीचे प्राण वाचतील याचे प्रात्यक्षिक डॉ.अमृता तुपकर -पुनसे यांनी विद्यार्थ्यांना दिले.
कार्यक्रमाच्या अध्यक्ष उपप्राचार्या प्रा.डॉ.माणिक मेहरे यांच्या बरोबर पर्यवेक्षिका प्रा.आशा गादे मंचावर उपस्थित होत्या.कार्यक्रमाचे संचालन व आभारप्रदर्शन प्रा.उज्वला भालेराव यांनी केले.

 बाबाजी दाते कला आणि वाणिज्य महाविद्यालयातील वर्ग १२ वा वाणिज्यची  विद्यार्थिनी कु. नम्रता ज्ञानेश्वर अरसोड हिने युवा जागर अंतर्गत "महाराष्ट्रावर बोलू काही" या शासनाच्या उपक्रमात आयोजित वक्तृत्व स्पर्धेत जिल्ह्यातून दुसरा क्रमांक पटकाविला आहे. राज्यस्तरीय स्पर्धेसाठी तिची निवड झाल्याबद्दल डॉ.अमृता तुपकर-पुनसे यांच्या हस्ते दि २८-८-२०१९ रोजी रोपटे देऊन सत्कार करण्यात आला. यावेळी उपप्राचार्या प्रा.डॉ.माणिक मेहरे तसेच कार्यक्रमाला उपस्थित सर्व शिक्षकांनी तिचे अभिनंदन करून तिला पुढील वाटचालीसाठी शुभेच्छा दिल्या.

भारताचे माजी राष्ट्रपती डॉ.ए.पी.जे.अब्दुल कलाम यांच्या जीवनकार्याने व राष्ट्रभक्तीने प्रेरित झालेला इस्रोचा एक युवा संशोधक आणि त्याची चमू मंगळ ग्रहावर पाठविण्यासाठी यान कसे तयार करतात, त्यांना काय काय अडचणी येतात व त्यावर ते कशी मात करतात व यानाचे यशस्वी प्रक्षेपण कसे करतात याचे सुंदर चित्रण म्हणजे "मिशन मंगल" हा चित्रपट ! महाविद्यालयीन विद्यार्थी जीवनात असे चित्रपट विचारांना कलाटणी देणारे ठरतात. म्हणून बाबाजी दाते कला आणि वाणिज्य महाविद्यालयाच्या कनिष्ठ विभागातील कला, वाणिज्य व एम्. सी‌. व्ही. सी. या तिन्ही शाखेतील विद्यार्थ्यांना दि.२४/८/२०१९ रोजी दुपारी १२ ते ३ या वेळेत 'सरोज टॉकीज" या चित्रपटगृहात नेऊन दाखविण्यात आला. प्रा.उज्वला भालेराव,प्रा.विजय गाडगे, प्रा.विलास केने तसेच प्रा. डॉ. वैशाली बेडेकर यांनी या उपक्रमाच्या सफलतेसाठी परिश्रम घेतले. सरोज टॉकीजच्या व्यवस्थापकांनी विद्यार्थ्यांसाठी तिकिटाच्या दरात ५०% सवलत दिली. तिन्ही शाखेतील एकूण ९२ विद्यार्थ्यांनी या सवलतीचा लाभ घेतला.

युवकांमधील वक्तृत्व कौशल्याचा आढावा घेणे आणि शासन योजनांविषयी त्यांची जागरूकता पडताळणे यासाठी महाराष्ट्र शासन शिक्षण व क्रीडा विभाग यांचे वतीने युवा संसदतर्फे ‘युवा जागर – महाराष्ट्रावर बोलू काही’ यावर यवतमाळ तालुकास्तरीय वक्तृत्व स्पर्धा आयोजित केली होती. श्री शिवाजी शिक्षण कनिष्ठ महाविद्यालय, यवतमाळ येथे दि.२०/८/२०१९ रोजी वक्तृत्व स्पर्धेचे आयोजन करण्यात आले होते. त्यात एकूण ३० विद्यार्थी सहभागी झाले होते. स्पर्धेसाठी युवा जागर-महाराष्ट्रावर बोलू काही याचे अंतर्गत एकूण १४ विषय दिले होते. या स्पर्धेत बाबाजी दाते कला आणि वाणिज्य कनिष्ठ महाविद्यालय, यवतमाळची, १२वी वाणिज्य शाखेची विद्यार्थिनी कु. नम्रता ज्ञानेश्वर अरसोड, हिने प्रथम क्रमांक पटकावला. पुष्पगुच्छ, प्रमाणपत्र आणि ₹ ५,००० असे या पुरस्काराचे स्वरूप आहे.
या स्पर्धेसाठी तिला प्रा. भालेराव यांचे सहकार्य लाभले. संस्थेचे अध्यक्ष श्री. विनायक दाते, उपप्राचार्या प्रा.डॉ.माणिक  मेहरे, कनिष्ठ महाविद्यालयाच्या पर्यवेक्षक प्रा. आशा गादे, प्रा.डॉ.वैशाली बेडेकर यांनी तिचे अभिनंदन केले व जिल्हास्तरीय स्पर्धेसाठी शुभेच्छा दिल्या.

In the morning, students took lectures in the class. Each student delivered lecture for 15 minutes each. The classes were taken during 8.30 AM to 11.00 AM. The class rooms were decorated by students with balloons and colour decorative papers.
At 11.30 AM, a get together was arranged. Shri Satish Phatak, Vice Chairman, Vanijya Mahavidyala Trust presided over the function. Mrs Prerana Puranik was the Chief Guest and Mrs Manik Mehere was Guest of honour.
At 11.30 Am, prizes were distributed to students who performed well in the programme. The first prize was awarded to Ms Vaishnavi Jayaswal {11th English medium}. Second prize went to. Mr. Ashutosh Rathi{12th English medium} and third prize to Ms. Komal Raut{12th English medium}
Entire programme was planned and organised by students themselves. Guidance was provided by all lecturers.

महाराष्ट्र शासन प्रधानमंत्री आरोग्य योजनेच्या अंतर्गत बाबाजी दाते कला आणि वाणिज्य कनिष्ठ महाविद्यालयातील १४ ते १८ वयोगटातील विद्यार्थ्यांना आयर्न व फॉलिक अॅसिड टॅबलेटस् चे वितरण
१४ ते १८  वयोगटातील विद्यार्थ्यांमधे आयर्न व फॉलिक अॅसिडची कमतरता निर्माण होऊ नये यासाठी शासनाने राबविलेला हा उपक्रम आहे. यामधे विद्यार्थ्यांना दर आठवड्याला आयर्न व फॉलिक अॅसिडची एक गोळी द्यायची आहे. हे कार्य कनिष्ठ महाविद्यालयाच्या प्रा. उज्वला भालेराव यांनी नियमितपणे पार पाडले आहे. महाविद्यालयातील सर्व विद्यार्थ्यांना या योजनेचा लाभ मिळाला.

जिल्हा विधी सेवा प्राधिकरण, जिल्हा न्यायालय व रिसोर्स सेल फॉर जुवेनाईल जस्टीस व बाबाजी दाते कला आणि वाणिज्य महाविद्यालय यांच्या संयुक्त विद्यमाने बाबाजी दाते कला आणि वाणिज्य कनिष्ठ महाविद्यालय येथे ३१ जुलै २०१८ रोजी महाविद्यालयातील विद्यार्थ्यांकरिता मुलांचे सुरक्षित जीवन व कायदे या विषयावर जनजागृती  कार्यक्रमाचे आयोजन करण्यात आले होते.

या कार्यक्रमासाठी अध्यक्ष एम.आर.ए. शेख, सचिव जिल्हा विधी सेवा प्राधिकरण तथा दिवाणी न्यायाधीश बस्तर हे होते. तर श्रीमती विजया पंधरे सहायक पोलीस निरीक्षक, श्री देवेंद्र राजूरकर व प्रशांत पुणेकर प्रकल्प अधिकारी आर.सी.जे.जे. हे प्रमुख मार्गदर्शक म्हणून लाभले. श्री. शेख यांनी प्राधिकरणाच्या विविध योजनांची माहिती दिली. तसेच विधी सेवा पुरविण्यास प्राधिकरण कटिबद्ध असल्याचे सांगितले. सहायक पोलीस निरीक्षक विजया पंधरे यांनी सध्या समाजात घडत असलेल्या घटना व मुलीनी कशाप्रकारे सावध राहणे गरजेचे आहे याची माहिती  दिली. बालक कोणकोणत्या गुन्ह्यात येत आहे ते कायदे व संबधित कलम काय आहे याची माहिती दिली. श्री. प्रशांत पुणेकर यांनी बाल अधिकार व बाल न्याय अधिनियम याबाबत सविस्तर माहिती दिली. श्री देवेंद्र राजूरकर यांनी मुले कोणत्या कारणाने गुन्ह्यात येतात व योग्य वर्तन ठेवल्यास मुले कशी  गुन्ह्यात येणार नाही याबाबत मार्गदर्शन केले. प्रास्ताविक डॉ. माणिक मेहरे यांनी तर आभार प्रदर्शन श्री. पांडे यांनी केले. कार्यक्रमासाठी महाविद्यालयातील शिक्षक व शिक्षकेतर कर्मचायाचे सहकार्य लाभले.